免費論壇 繁體 | 簡體
Sclub交友聊天~加入聊天室當版主
分享
返回列表 回復 發帖

【香港電影金像獎終身成就獎】楚原自爆曾被嫌棄







【金像獎】楚原自爆曾被六嬸嫌棄 終身成就獎得獎致辭值千金

84歲嘅楚原(原名張寶堅)獲頒「終身成就獎」,並由首徒馮淬帆頒發。馮淬帆出場時話:「大概喺1967,當時仲係麗的做播音,啱啱有兩餐飯食,之後有電話打嚟話楚原搵你拍戲,我就係咁拍《紅花俠盜》入行。我之後同佢講「我想做導演。」馮淬帆之後馮跟住其他前輩學做副導演,楚原有次分工作俾佢,不過馮做完之後,太多鏡頭係close up,就俾楚原指責。馮淬帆話:「佢唔只係帶我入電影界嘅恩人,亦係我永遠嘅師父。」

大會介紹,楚原由1955年投身編劇工作,參與製作過百部電影,1973年邵氏推出首部電影《72家房客》就係由楚原執導,拍出香港人生百態,並創出票房高峰。從此一度消失嘅電影恢復製作,香港電影史就由此改寫,背後堅持以粵語嘅推手就係楚原導演。

楚原撐著柺杖,由太太南紅同孫女陪同上台,一臉白鬚,但樣子好精神,全場企起身拍手。楚原話:「Thank you,請坐,請坐,請坐。好多謝我大徒弟馮淬帆,捱義氣由台灣嚟頒呢個獎畀我,揸住先啦(獎座)。」

「我諗大家都好想知道,我拖住呢個妹頭係乜人,佢係張家嘅大小姐,我哋嘅大姐大,今年6歲,樣貌都唔錯吖,係佢爺爺心中嘅綠寶石。佢今晚夠義氣呀,佢平時八點半就瞓覺,今晚捱到十點,同大家打個招呼啦!」之後楚原就安排孫女返後台,早啲瞓覺。」

之後楚原講咗一段發人深省嘅感言:「將一個終身成就獎,頒畀一個終身冇乜成就嘅楚,你哋即係監逼我講句受之有愧。回首半生,青衫人老,喺漫長嘅人生中,有開心時候,但困難日子都有唔少。人生大概都係失意倍多,如意少。

「我破咗香港賣座紀錄,老闆即刻同我簽張新合同,人工加咗十倍,個個都話我係香港最幸福嘅導演,十幾年後我嘅戲唔賣片,拍完幾部仆街片,就想拍《天龍八部》,開鏡前一日,方逸華小姐入嚟撕咗張通告唔畀拍。入到寫字樓第一句就問我:『邊個畀你拍《天龍八部》,蝕錢你有錢賠咩?』最後兩句就話:『楚原,你根本唔識電影藝術,你根本唔識拍電影,嗰時人人都話我係邵氏公司最難堪嘅導演。

「但人生呢兩個字,就係歡聲同淚影,呢四個字砌成,冇乜奇怪吖!任何人,無論你噚日幾風光,噚日幾失意,聽日天光一樣要起身做番一個人,繼續生活落去,因為明天總比昨天好,呢個就係人生。」全場都拍掌!

楚原繼續話:「唔講你唔知,人生原來同打麻雀一樣,有東南西北風,打到北風又係另一個人生。如果你老到我係咁,冇得撈,記得後生剩番個錢,如果你老到好似我咁,連終身成就都攞埋,你就應該『管他天下千萬事,閒來輕笑兩三聲』。到老時候,無論外面發生咩事,『管他喜怒哀樂,管他恩怨情仇』,全部都係菩提明鏡,笑吓就算,古今多少事都付笑談中,我送畀大家我喜歡幾句,『當你回首往事,不因碌碌無為而悔恨,不為虛度年華而羞恥』,咁你就可以好驕傲咁同自己講:『你,無負此生』,多謝!」


https://hk.entertainment.appleda ... e/20180415/58078099

楚原上台領獎時場內所有觀眾一同站起來鼓掌。



【金像獎2018】楚原奪終身成就獎爆粗嘆好景不常:拍咗幾部仆X片

今屆香港電影金像獎終身成就獎得主楚原今晚親自到文化中心領獎,他帶著一名小女孩上台,並向現場觀眾介紹她是其孫女,更笑言:「佢都好畀面,平時佢8點幾就瞓啦!」全場觀眾隨即爆笑。

楚原在台上道出得獎感言時說:「起初我加咗 人工,有人話我係邵氏最幸福導演,拍完幾部仆X片,就有人話,楚原你根本唔識電影藝術。。。」他續說:「任何人無論你今日幾風光,聽日幾倒霉,聽日你起身都係要過。。。呢個就係人生,人生原來同打牌一樣。。如果你老到好似我咁冇得撈。。如果你好似我咁連終身成就獎呢個老人牌都拎埋。。你應該好似我咁。。咩都笑下就算。。。」

現年已84歲的楚原是本地著名粵語片演員張活游之子,1956年投身電影圈的他,1958年已經個人執導作品《湖畔草》,入行短短4年便有代表作──1960年的社會倫理悲劇《可憐天下父母心》,直至60年代末,粵語電影開始衰落,楚原執導了個人首部國語武俠片《龍沐香》,當時他的事業一帆風順,更於1971年加入了邵氏電影公司,不過後來他有幾部電影作品票房稍差,正是他在上台領獎時所講的「幾部仆X片」,他指自己當時被嘲是邵氏公司內最難堪的導演,更有傳六嬸方逸華因此而棄用他作導演。
撰文:林穎嵐


https://www.hk01.com/%E9%9B%BB%E ... 6%EF%BD%98%E7%89%87

楚原由大徒弟馮淬帆(右)手上領取終身成就獎


84歲楚原獲頒終身成就獎。


楚原由太太南紅及孫女陪同領取終身成就獎。

金像獎:楚原笑看人生獲頒終身成就獎

終身成就獎由50至80年代著名導演楚原獲得,現年84歲的楚原24歲開始執導首部電影,第二部作品《可憐天下父母心》已經轟動一時,及後的《黑玫瑰》、《大丈夫日記》、《七十二家房客》及一眾由古龍小說改編的電影大多都成為經典,並由其大徒弟馮淬帆負責頒獎,馮淬帆直言視他為永遠的恩人及恩師:「係佢帶我入行,1974年我第一次執導電影,嗰部戲嘅第一個鏡頭係佢同我擺機位嘅!」

楚原與太太粵劇名伶南紅拖住6歲孫女到場致辭,他說:「將呢個終身成說獎頒畀我呢個終身冇咩成就嘅人,我受之有愧,回首半生青山人老,漫長人生有開心事,困難都唔少,人生係失意多如意少,我拍咗套破票房紀錄嘅戲,老闆同我簽新合約,人工加十倍,個個都話我係最幸運嘅導演,但十幾年後我拍咗幾部仆街片,到想拍《天龍八部》,方逸華小姐唔畀拍,話我蝕咗賠得起咩?仲話我唔識電影藝術,嗰陣個個話我係最難堪嘅導演。人生係由歡聲、淚影四個字砌成,冇咩奇怪,任何人無論幾風光、幾失意,第二朝天光一樣要起身生活,明天總比昨天好,呢個就係人生!」贏得全場掌聲。

他續說:「人生似打麻雀有東南西北風,當你打到北風,就係另外一個人生,好似我老到冇得撈,記得後生儲番個錢呀!管它喜怒哀樂,笑下就算!」


http://hk.on.cc/hk/bkn/cnt/enter ... 0415_00862_001.html
】金像獎感言中,楚原教打工仔的幾件事

金像中攞咗終身成就獎的楚原,其感言在網絡瘋傳,唔止被讚才情兼至,更蘊藏對全天下打工仔的警言。

1.對老闆最淒美的報復

楚原的導演人生,同一眾打工仔一樣,有起有落。佢做過全香港最幸福的打工仔,因為破咗香港賣座紀錄,老闆即刻加佢十倍人工。之但係佢後來又成為邵氏最難堪的導演,因為,拍完幾部仆街片,想拍《天龍八部》的開鏡前一日,畀「老闆」方逸華入撕咗張通告唔畀拍,仲質疑佢:「蝕錢你有錢賠咩?你根本唔識電影藝術,你根本唔識拍電影。」當日的不如意,在今日對家電視台的大氣電波中公諸於世,仲唔係對老闆當日所作所為的最淒美報復?打工仔真係記得儲起彈藥,因為你唔會知道自己幾時吐氣揚眉,幾時可以爆前老闆大鑊!

2.明天繼續努力返工

學楚原話齋,任何人,無論昨日幾咁風光、幾咁幾失意,聽朝一樣要起身做番一個人,繼續生活,因為明天總比昨天好,呢個就係人生。冇錯,今日俾人讚一句,唔好以為有得上位,明天做嘢一樣歸零,一樣可以立即俾人炒。俾人鬧的道理亦如是,因為聽日只要唔俾人鬧,你就已經賺咗。保持呢種工作態度,輕易做到六十歲退休,仍然絲毫無損,小編所指的是「自尊心」。

3.打工如打牌

楚原話,人生原來同打麻雀一樣,有東南西北風,打到北風又係另一個人生。打工何嘗唔係吖,只要冇人割籮青,只要同事都快手快腳,打多幾圈、轉多幾次北風,個個打工仔都有可能食到屬於自己的十三么。

打工仔,共勉之啦!
扮工男女


https://hk.news.yahoo.com/%E7%86 ... A%8B-024951669.html
返回列表